Ki di Kenny di “Kle Kou”! Ki se youn nan mizik ki montre otantisite’l antanke atis. Mizik sa, se nimewo 3 sou albòm lan tankou lè li fè 3 zè e solèy la kontinye ap briye menm jan Kenny briye nan HMI la.
Solèy la briye plis toujou a midi (12 pm). Albòm sa gen 12 mizik, ki baze sou konsèp revèy la, ki gen 12 chif ladan. Tankou Carel Pedre te di nan yon layv, ekip Kenny an fè yon bèl travay nan kouvèti albòm lan paske chak tit nan mizik lan koresponn ak yon lè nan revèy la.
Mkonnen ou bezwen konn kilè li ye. Ebyen se inè li ye tonton! Donk se lè pou Kenny te fè “Intro” albòm lan ak pitit gason’l Idris.
Menm si li fè 2 zè “Pour Elle”, Kenny kontinye fè mizik pou fè ti kè medam yo bat fò. Yon tèks ki chaje ak emosyon tankou Arly Lariviere toujou fèl.
Poutan 4è se “Pi Bon Chwa” pou’w fè piknik ak yon moun ke’w renmen. Konsa wap fè’l tande mizik Kenny featuring Richard Cave a pou montre’l kijan ou damou’l e menm di’l ke li se pi bon chwa ke’w fè pandan wap profite danse avèl sou mizik la.
Lè 5è se lè “Fake Friends” vle vinn bay baz. Depi’w fatige ak yo, ou mèt kwè’m avek Tony Mix ki sou mizik sa wap danse amapiano sa byen, koz nenpòt sa yo panse de ou, ou pap kyè.
“Ki Mele’m” li 6 zè! Paske mizik sa tèlman klasik li menm anvi fè chwazi’l kòm mizik maryaj. Anplis li anvi bay yon ti twoubadou lè li ap komanse a, se sa nèt.
Li 8è, li pa lè pou’w ap rele Kenny “Lucky Man”. Aprè li finn fè plizyè ane ap travay san kanpe, e san domi ap travay sou albòm li an. Se moman pa’l pou’l briye. Fòk nou kontinye bat bravo pou li e sipote’l tou, koz se travay li ki mete’l la.
Li fè 9è “Bel Bebe”! Se jis yon rapèl ke mizik sa pale de moral, ak konsyans kap ede medam yo rejwenn konfyans nan tèt yo. Pandan ke mizik la vle fèw danse kole sèlman, li tou raple’w ke “ti cheri ou paka nan bagay sa.”
Mwen gen “Tò Mwen”, paske li 10 zè e mrete tèt frèt ap tande mizik Kenny ak Fatima ki ap chante anpil verite ke nou ap viv nan relasyon santimantal nou.
Tankou KitKat di nan Sak Cho: lage’m sou 11 zè. Menm si ou ka pat vle lage “2 Bra Balanse”, li enpòtan pou’w fè yon reflechi nan moman sa yo.
Li minwi (12 zè), ou ka “Kriye” an silans. Jan Kenny montre’l la, li nòmal pou’w kriye pou’w ka santi’w soulaje. Kèlke swa sa’w ap travèse a, dèfwa li bon pou’w kriye. Menm si’w ta mande èske solèy la kontinye briye lè li fè nwa? Verite a se ke solèy la toujou briye menm si’w pa wè’l pou yon moman. Sonje tou, ke revèy la divize an 12 pati egal kom teyori ki montre enpòtans travay an ekip ak kontribisyon pèsonel. Sa vle di albòm lan ki gen 12 mizik sa pa tap posib san sipò anpil lòt moun. Tankou: Manager Juan, Adamsbeat ki fè 3 mizik sou albòm lan, Dongabeat ki Brezil, Bbobeat, Aspen, El chapo ki fè solo sou kèlke mizik, Magic Touch ki mikse tout albòm lan e grafis la, Bobby. Revèy la toujou gen 12 zè tan, paske’l jwe wòl yon ansyen istwa tankou lè Kenny te fè EP ki te rele Versatile la, e kòmansman yon nouvo chapit ki se lè albòm sa.
Menm si anpil moun te gentan mete alam yo sou 7è pou “BIF” la, men Kenny se lapè l’ap mete jan li chante annou kraze bif la featuring Michael Guirand. Mizik sa se yon bon jan konpa ki preche rekonsilyasyon. Kenny di’l nan mizik lan, “ann pa kite ogèy pou nou paka fè lobèy”. E kilè li fè la? It’s Kenny Time! “Time to Shine.”
