Samdi 1e Mas, Miami te tounen Hollywood pou premye sòti fim “July7” lan, ki reyalize pa Robinson Lauvince. Sware sa te yon evènman ekstraòdinè, kote tout detay te gen nivo Oskar Entènasyonal, yon bagay ke nou potko janm wè anvan nan kominote a!
Tapi wouj la te fèt ak yon konsepsyon san parèy, mete ansanm ak bèl achitekti sinema Olympia ki te bay evènman an yon klas espesyal. Anplis, te gen anpil nan aktè ak aktris yo ki te la tankou Raquel Pélissier, Eddy Francois, Tico Armand, Anthony Alvarez epi plizyè envite selèb Ayisyen kou etranje tankou Stacy Barthe, ki te prezan pou selebre bèl travay sa a. Medya nasyonal e entènasyonal, prezans plizyè ansyen Miss e Mister, ak piblik la te mobilize pou sipòte pwojè sa kote sal teyat la te ranpli.
Premye sòti fim July7 ranmase anpil aspè nan istwa nou.Paske te gen penti gras ak ekspozisyon e donasyon tablo pou aktè yo, fresco little Haiti, san bliye modèl yo ki abiye an Afranchi, epi an revolisyonè 1804 yo, mete talan, istwa ak kilti nou an sou pi gwo sèn lan. Anplis, lè nou antre pi fon nan fim nan, nou jwenn tout eleman ki fè sinema ayisyen an grandi: komedi ak karaktè Guerin (B Garmel), bote lanati Ayiti, ak eritaj kiltirèl nou an, san nou pa bliye Vodou, ki se rasin espirityalite nou.
Men sa ki fè fim nan pi espesyal: se yon istwa reyèl sou asasinay Prezidan Ayisyen an. “July7” pa sèlman rakonte sa ki te pase, men li mete limyè sou verite ak reyalite Ayiti atravè yon istwa ki chokan, men nesesè.
San dout, premye sòti fim sa a make listwa! Ayiti merite sinema ki reflechi sou reyalite li, epi Robinson Lauvince fè sa ak “July7”.
“July7” se plis pase yon fim, se yon mouvman, yon evènman ki mete istwa nou an sou sèn mondyal la!
