Mèkredi 26 Fevriye 2025, Kenny Haiti resevwa prim “Best Artist Diaspora in the Caribbean” nan Trace Awards ki te dewoule nan Zanzibar, Afrik. Viktwa sa a se pa sèlman yon reyalizasyon pèsonèl pou Kenny, men tou li se yon sous fyète pou tout Ayisyen yo. Tankou jan non atis li ye a “KENNY HAITI” ke nou kapab di “KENNY pou AYITI.”
Siksè Kenny Haiti se yon prèv ke gen espwa, gen valè, e gen talan kap mete peyi nou sou kat mond lan. Albòm li an ki rele “Time to Shine” te anonse li, epi jodi a, li klere vrèman vre. Li montre ke ak disiplin, detèminasyon, ak renmen sa w ap fè, ou ka reyalize rèv ou.
Kenny Haiti pa’t jwenn prim sa pa chans. Se yon atis ki travay di, ki mete talan li ak pasyon li nan chak mizik li. Depi Ayiti rive Ozetazini, Kanada, Lafrans, ak tout rès mond lan, moun ap tande e apresye son inik li pote yo. Paske mizik li yo ak kolaborasyon yo chaje enèji kiltirèl, emosyon, ak verite.
Nou swete Kenny Haiti plis siksè ak plis rekonesans nan karyè li. N’ap kontinye onore li, kenbe li fèm, e sipòte frè nou! Ayiti fyè de ou Kenny Haiti!
