IDANTITE’N se pa sèlman yon mizik men se non 7èm albòm gwoup HARMONIK lan ki gen 16 mizik ladan.
Se yon albòm konpa ki klasik, dous ak melodi mizikal ki toujou bay anvi danse kole, e prèske chak pawòl ka fè’w pèdi lòlòj ou, lè’w dekòtike yo.
Albòm sa se tankou Harmonik ap montre nou mizik yo se yon deba, yon dyalòg ant emosyon ak rit. Paske emosyon pa sèlman santimantal, e se sak montre konfreri ki genyen ant yo menm ak Maestro Richi, Andy Beatz sou mizik Doukounou an. Anplis li gen yon atis entènasyonal, Rotimi, ki se yon fanatik konpa ki chante sou li. Kòm Rotimi renmen peyi nou Ayiti, sa vinn antre nan idantite’n ke Maestro Nickenson Prud’homme e Mackendy Talon (Marc-D) ap promote a.
Albòm sa gen anpil nouvote swa nan fason ke yo itilize teknoloji a, tankou imaj Avatar yo pou chante kèlke mizik, oubyen pou reprezante lòt vwa fanm ki t’ap fè refren. Anplis, li rich nan lang tankou Kreyòl, Fransè ak Anglè. San bliye senplisite yo sou kouvèti albòm lan tou bay yon amoni ki konplè, e ki fè yo abiye an blan tankou blan koton.
Yon bagay etonan sou sòti albòm sa, se ke li vini ak anpil senbòl de chif de. Dezyèm mwa a (mwa lanmou), dezyèm jou, de chantè Harmonik ki rantre ann amoni youn ak lòt e kote zanj youn, zanmi ak zanj lòt, pou yo trase egzanp pou lòt yo. Amonizasyon an fèt, donk Harmonik pare.
